මාධ්‍යවේදී නිමලරාජන් මයිල්වාගනම් ඝාතනය කර අදට(ඔක්තෝබර් 19) ට වසර 15ක් ගතවෙයි. 2000 ඔක්තෝබර් 19 වනදා යාපනයේ අධිආරක්ෂක කලාපයකදී නිමලරාජන් ඝාතනය කරන විට බීබීසී සිංහල සහ දෙමළ සේවයට මෙන්ම වීරකේසරී පුවත්පතට සහ රාවය පුවත්පතට විශේෂයෙන් උතුරේ සිදුකරන ව්‍යසනයන් වාර්තා කරමින් සිටිය හ. 2000 වර්ෂයේදී චන්ද්‍රිකා බණ්ඩාරණායක ජනාධිපතිවරිය සිය පාලනය ගෙන ගිය සමයේ, අනුරුද්ධ රත්වත්තේ නියෝජ්‍ය ආරක්ෂක ඇමතිධූරය දැරෑ කාලයේ නිමලරාජන් මාධ්‍යවේදීයා ඝාතනය කරනු ලබන්නේ ඇදිරිනීතිය පනවා තිබූ රැයක, අධිආරක්ෂක කලාපයක් ලෙස නම් කර තිබූ ප්‍රදේශයක, සන්නද්ධව පැමිණි කණ්ඩායමක් විසින් ඔහුගේ නිවස තුළදීම ය. ඔහුව ඉතා අමානුෂික ලෙස ඝාතනය කිරීමට හේතුව වූයේ දිගින් දිගටම නිමලරාජන් මාධ්‍යවේදියා විසින් යාපනයේ සිදුවන සිදුවීම්, සිය මාධ්‍ය ක්‍රියාවලිය ඔස්සේ ලෝකය හමුවේ හෙළි කරමින් සිටිමයි. එය ඉවසාගත නොහැකි වූ ඝාතකයින් නිමලරාජන්ව ඝාතනය කර පළා යාමට තරම් ශක්තිමත් වූයේ, එවකට ආරක්ෂක අංශවල මෙන්ම ඇතැම් දේශපාලකයින්ගේ ආශිර්වාදයත්, එම ඝාතනය පිටුපස තිබුණු බවට අදටත් රහසක් නොවේ.

කෙසේ නමුත් නිමලරාජන් මාධ්‍යවේදියා ඝාතනය කොට හමාරය. පසුගිය කාලයේ ලංකාවේ සිදුවූ මාධ්‍යවේදීන් ඝාතනය කිරීම්, පහරදීම්, පැහැරගැනීම් සහ අතුරුදහන් කිරීම් වල පරීක්ෂණයන් මෙන්, මෙම ඝාතනය පිළිබදව ද වසර 15ක් ගත වුව ද, මාධ්‍යවේදී ප්‍ර‍ගීත් එක්නැලිගොඩ අතුරුදහන් කිරීම සම්බන්ධයෙන් දැනට අත්අඩංගුවට පත්ව ඇති හමුදානිළධාරීන් හැර, කිසිදු හෙළිදරව්වක් නිළ වශයෙන් අනාවරණය කිරීමට බලධාරීන්ට නොහැකි වී ඇත.

මේ කෙටි සටහන නිමලරාජන් ඝාතනයේ පරීක්ෂණ පිළිබදව සොයා බැලිමක්වත් එහි ගවේෂණයක්වත් නොවේ. පසුගිය කාලය පුරාම ලංකාවේ මාධ්‍යට එල්ලකරන ලද මර්දනයට වගකිවයුත්තන් නීතිය ඉදිරියට ගෙන ඒමට, පසුගිය ජනවාරි 8වෙනිදා පත් වූ නව ආණ්ඩුවට කෙරෙන බල කිරීමකි. එය එසේ වන්නේ ලංකාවේ පුරවැසියන් රාජපක්ෂ ආණ්ඩුව පරාජය කරන ලද්දේ එතෙක් පැවති අයුක්තියට – යුක්තිය බලාපොරොත්තුවෙන්ය. අසාධාරණයට – සාධාරණය බලාපොරොත්තුවෙන්ය. එය ඉටුකිරීමට යහපාලනයට නොහැකි වුවහොත් රාජපක්ෂ ආණ්ඩුවට අත්වූ ඉරණමම යහපාලනයට ද අත්වෙනු ඇති බැවිනි.

නිමලරාජන් මාධ්‍යවේදීයා පිළිබදව ඔහුගේ සමීපතම මිතුරෙකු වූ යාපනයේ මාධ්‍යවේදියෙකු වන තයාබරන්, පසුගිය 2012වසරේ අගෝස්තු 11දා අපට මුණ ගැසුණේ බන්ධනාගාරයක් තුලදී මරා දැමුණූ යාපනයේ මරියදාස් ඩෙල්රැක්ෂාන්ගේ අවසන් කටයුතු සිදු කරමින් තිබූ යාපනයේ සුසාන භූමියක දීය.

නිමලරාජන්ගේ දේහය ද මිහිදන් කර තිබුනේ එම සුසාන භූමියේ වුවත්, දැන් එම සුසාන භූමියේ ඇති නිමලරාජන්ගේ සිහිවටනයට කිසියම් පිරිසක් හානිකර ඇත්තේ ‘මර්ධනය‘ එසේ ම පවතිනවා යන්න සිහි කරගැනීමට මෙනි. එදින අප තයාබරන්ගෙන්, නිමලරාජන් පිළිබදව විමසූවෙමු. එහිදී ඔහු ප්‍රකාශ කළ කරැණු පසුගිය වසරේදීත් මාධ්‍යවේදී නිමලරාජන් සිහිකරමින්, ඔහුට යුක්තිය ඉෂ්ඨ කිරීමට බලකරමින් එම සටහන තැබු අතර අද ද එම සටහන ඒ පරිද්දෙන්ම නැවතත් තබන්නේ එහි ඇති සියුම් වැදගත්කම නිසාවෙනි.

මේ මාධ්‍යවේදී නිමලරාජන් සහ නිමලරාජන් ඝාතනය පිළිබදව, මාධ්‍යවේදී තයාබරන් සමග පැවත්වූ සාකච්ඡාවේ සටහන නැවත මෙසේ පළකරමු.

‘‘මගේ මිත‍්‍රයෙක් වන නිමලරාජන් තමයි මාව මාධ්‍ය කේෂත‍්‍රයට හඳුන්වලා දුන්නෙ. නිමලරාජන් සමග මම අවුරුදු 4ක් 5ක් විතර වැඩ කරලා තියෙනවා. එයාගෙ මරණෙට පෙර අන්තිමටට දුරකථනයෙන් කතාකරපු අයගෙන් මමත් එක්කෙනක්. එයාගෙ ආරක්ෂාවට තිබුණු තර්ජන ගැන අන්තිම කාලෙදි මට කියලා තියෙනවා. රජය සමග සිටින ඊ.පී.ඞී.පී නායක ඩග්ලස් දේවානන්ද එයාගෙ මරණය පිටුපස ඉන්නවා කියන එක කවුරුත් දන්න තොරතුරක්. නිමලරාජනුත් ඒ පිරිසගෙන් තමාට මරණ තර්ජන තිබූ බව අපට කිව්වා. ඩග්ලස් දේවානන්දගේ නියෝගය මත එතුමාගේ යටතේ සේවය කළ නැපෝලියන් (දැන් ඔහු ලන්ඩනයේ දේශපාලන රැකවරණ ලබා සිටිනවා) නිමලරාජන් ඝාතනය කළේ කියලා හැමෝම දන්නවා. සුපුරුදු ලෙසම ශ‍්‍රී ලංකා රජය නිමලරාජන්ගේ නඩුවත් අතහැරලා තියෙනවා. නීතිපතිගේ නියෝගය තවම ලැබිලා නැහැ කියලා අවුරුදු 8ට වැඩි කාලයක් තවමත් ෆයිල් එක ඔහේ දාලා තියෙනවා.

නිමලරාජන් ලංකාවේ ජනමාධ්‍යවේදීන්ට ආදර්ශයක්. නිමලරාජන් කියන්නෙ ප‍්‍රවීණ ජනමාධ්‍යවේදී සිවරාම්ගෙ පරපුරේ කෙනෙක්. එයාට දෙමළ, සිංහල සහ ඉංග‍්‍රීසි යන භාෂා තුනම හොඳින් භාවිතා කරන්න පුළුවන්. රාවය, බීබීසී සංදේශය වැනි ප‍්‍රධාන මාධ්‍ය වල එයා වැඩ කරලා තියෙනවා. යාපනයට නිමලරාජන්ගෙ අඩුව පුරවන්න වෙන කෙනෙක් නැහැ. නිමලරාජන්ගෙ පවුලෙ අයව අපි ආරක්ෂිතව විදේශකට යවලා තියෙනවා.

අපි දැන් නිමලරාජන් නමින් සංවිධානයක් පිහිටුවලා තියෙනවා. එම සංවිධානය ජනමාධ්‍යවේදීන්, ඒ අයගෙ පවුලෙ අය, ජනමාධ්‍ය කේෂත‍්‍රය සම්බන්ධ අය පිළිබඳව හඬ නගන වගේම උදව් උපකාරද ලබා දෙනවා. ඒ සමග වන්නි යුද්ධයේ හානියට පත් ජනමාධ්‍යවේදීන් සහ එම පවුල් වලටද අපි උදව් ලබා දෙනවා, ජනමාධ්‍යවේදීන් සිහි කරමින් පොත් එලි දක්වනවා. මේ අකාරයට හැම අවුරුද්දදෙම නිමලරාජන් සංවිධානය විසින් කටයුතු කරනවා. ඒ වගේම මේ කටයුතු අපි දිගින් දිගටම කරගෙන යනවා.

නිමලරාජන්, සිවරාම් ඝාතනය වූ පරිසරයම තමයි දැනටත් තියෙන්නෙ. ජනමාධ්‍ය නිදහස නැහැ. මෙහි මාධ්‍ය නිදහසක් කියලා දෙයක් නැහැ. දැනුත් අපි සාමාන්‍ය කැමරාවක්, සාමාන්‍ය රෙකෝඩරයක් ගෙනාවේ. ඒකත් ගෙනාවේ කාටවත් නොපෙනෙන විදිහට. අපිට සිදුවීමක් වෙන තැනකට වෘත්තීමය කැමරාවක් රැගෙන යන්න බැහැ. අපිව ලූහුබඳිනවා. අපේ රාජකාරිය අවසන් වෙලා ගෙදර යනකන් අපේ ආරක්ෂාව ප‍්‍රශ්නාර්ථයක්. ශ‍්‍රී ලංකා රජය දෙමළ ප‍්‍රදේශය වල තිබෙන ජනමාධ්‍ය මර්ධනය කිරීමෙන් ජනතාවට ඇත්ත තොරතුරු දැනගැනීමට තිබෙන අවස්ථාව වලක්වනවා.‘‘ – මාධ්‍යවේදී දයාබරන් (සාකච්ඡාවක් ඇසුරෙනි)

[Re-Post]

පසු සටහනක්

ගෙවී ගිය වසර 15 දී විවිද ආණ්ඩු බලයට පත් විය. ඒ බොහොමයක් ආණ්ඩුවල නායකයින් විසින්, මාධ්‍යවේදීන් ඝාතනය කිරීම්, අතුරුදහන් කිරීම්, පහරදීම් වැනි ලංකාවේ මාධ්‍යවේදීන්ට සහ මාධ්‍ය ආයතනවලට එල්ල කරල ලද මර්දනයට වගකිවයුත්තන් නීතිය ඉදිරියට පමුණුවන බව දිව්රා පොරොන්දු දුන්නේය. නමුත් ඒ කිසිවක් සිදුවුනේ නැත.

දැන් තවත් නව ආණ්ඩුවක්, ඔවුන්ගේ වචනවලින් කියන්නේ නම් ‘සම්මුති ආණ්ඩුවක්‘ ලංකාවේ බලය හොබවයි. ඔවුන් ද ජනවාරි 8වෙනිදාට පෙර කීවේ පසුගිය කාලයේ මාධ්‍යට එල්ලකරන ලද මර්දනයට අදාල වගකෙිව යුත්තන් නීතිය හමුව පමුණු වන බවය. එ් ප්‍ර‍කාශයන් ක්‍රියාවෙන් සනාත කරන බවට යම් පමණකට හෝ පෙනෙන්නට තිබෙන්නේ මාධ්‍යවේදී ප්‍ර‍ගීත් අතුරුදහන් කිරීම පිළිබද පරීක්ෂණ පමණි. එහි පරීක්ෂණත් ගමන් කරන්නේ මන්දගාමී වය. එපමණක් නොවේ වර්තමාන යහපාලන ආණ්ඩුවේ අභ්‍යන්තරයෙන්ම කකුලෙන් ඇදීම් ද සමගය. නමුත් අනෙක් සිදුවීම් බොහොමයකට සාධාරණ සහ වේගවත් පරීක්ෂණයන් සිදුවන බවක් පෙනෙන්නට නැත. නිමලරාජන් ඝාතනය කර වසර 15ක් ගතවන්නේ ඒ තත්ත්වය තුළයි. එසේම වසර ගණනාවකට පසු පාර්ලිමේන්තුවේ විපක්ෂනායකවරයෙක් ලෙස දෙමළ ජාතිකයෙක් වන සම්බන්ධන් මහතා පත්ව තිබේ. එබැවින් ඔහුටවත් මේ සම්බන්ධයෙන් පාර්ලිමේන්තුව තුළ අවම වශයෙන් ප්‍ර‍ශ්න කිරීමටවත් සාදාචාරයක් තිබිය යුතුය. එසේ නොවුනහොත් සම්බන්න්ධන් මහතාවත් ‘පරණ දේශපාලන කුණු කූඩයට‘ ජනතාව විසින් තල්ලු කර දමනු නිසැකය.

vikalpa

ධර්මරත්නම් සිවරාම් හෙවත් තාරකී ජනමාධ්‍යවේදීයා ඝාතනය කර අදට(28) වසර 10ක් ගත වී ඇත. 2005 අප්‍රේල් 28 වන දින බම්බලපිටිය පොලීසිය අසලදී වෑන් රථයකින් පැමිණි කණ්ඩායමක් විසින් සිවරාම් පැහැරගෙන ගොස් ඇතැයි වාර්ථා විය. ඊට පසු දින සිවරාම්ගේ මළ සිරුර පාර්ලිමේන්තුව අසලින් සොයා ගත්තේය.

1959 අගෝස්තු 11වන දින මඩකලපුවේදී උපන් ධර්මරත්නම් සිවරාම්, ජනමාධ්‍යවේදියෙකු, ලේඛකයෙකු මෙන්ම ප්‍රවීන යුධපුවත් විශ්ලේෂකයෙකු සහ ප්‍රකට දේශපාලන විශ්ලේෂකයෙකු විය. 1982 ගාන්ධියන් ව්‍යාපාරයෙන් තම දේශපාලන දිවිය ආරම්භකල සිවරාම් ප්ලොට්, ඩීපීඑල්එෆ් වැනි දේශපාලන සංවිධානවල ක්‍රියාකාරිකයෙක් විය. ජනමාධ්‍යවෙිදියෙකු ලෙස ධර්මරත්නම් සිවරාම් හෙවත් තාරකී ප්‍රධාන ධාරාවේ මෙන්ම අන්තර්ජාලය පදනම් වූ ප්‍රවෘත්ති මාධ්‍යන් හි දේශපාලන සහ දේශපාලන විශ්ලේෂකයෙකු ලෙස ක්‍රියාකාරී විය.

මෙවන් ප්‍රවීණ ජනමාධ්‍යවේදියෙකු, දේශපාලන විශ්ලේෂකයෙකු ලංකාවේ පොලීසියක් ඉදිරිපිටදී පැහැරගෙන ගොස් ඝාතනය කලේ ය. එමපමණක් ද නොව ඝාතනය කරන ලද සිවරාම්ගේ සිරුර හමුවුයේ රටේ උත්තරීතරම ආයතනය ලෙස හදුන්වා ගන්නා ශ්‍රී ලංකා පාර්ලිමේන්තුව අභියස දීය. ඒ අධිආරක්ෂිත කලාපයක් තුළදී ය. පොලීසියක් අසලදී පැහැරගෙන ගොස් පාර්ලිමේන්තුවක් අසලදී මිනිසෙකු මරා දැමීමට තරම් ඝාතකයන් ශක්තිමත් වූයේ කෙසේ ද? අධිආරක්ෂිත කළාපයක මෙවන් සිදුවීමක් සිදුකරන්නට හැක්කේ කාටද?

ආරක්ෂක අංශවලට හෝ බලධාරීන්ට මෙතෙක් විසඳාගැනීමට නොහැකි වූ ගැටලුවද එය යි. එපමණක්ද නොව මේවන විට විසදීමට ගන්නා සුලු උත්සහයන්වල පවා දක්නට ඇත්තේ ද අන්ත දුගීභාවයකි. එබැවින් තවමත් නොවිසිදී ඇති ගැටලුව ද එයයි. එයින් මතුවන තවත් කරුණක් ඇත. අධිආරක්ෂිත කලාපයක මෙවන් දෙයක් සිදුවීමවත්, විසදාගැනීමට බලධාරීන්ට නොහැකි වූයේ ඇයි ද යන ගැටලුවයි? ‘සීනි හොරෙන් කෑ අය විසින්ම, සීනි හොරෙන් කෑ අය සෙවීමට යාමේදී ‘සීනි හොරා‘ කිසිම දිනක හමුනොවනු ඇත‘ යන කියමන මෙහිදී ලියුම්කරැට මතක් වේ.

මෙම තත්ත්වය සිවරාම්ට මෙන්ම, ලංකාවේ ජනමාධ්‍ය ක්ෂේත්‍රයේ ඝාතනය කළ, අතුරැදහන්කල මෙන්ම පහරදීම් සිදුකල මාධ්‍යව්දීන්ට මෙන්ම මාධ්‍ය ආයතනවලට ද එකසේ අදාලය. විශේෂයෙන් අධිආරක්ෂක කලාපයක් තුළ ඝාතනය කල මාධ්‍යවේදී ලසන්ත වික්‍රමතුංග, මේ වනවිටත් කිසිදු තොරතුරක් නොමැති අතුරැදහන්කල මාධ්‍යවේදී ප්‍රගීත් එක්නැලිගොඩ මෙන්ම පසුගිය වසර ගණනාවකදී ලංකාව තුල මෙසේ ඝාතනය කල, අතුරැදහන්කල සහ පහරකෑම්වලට ලක්වුනු මාධ්‍ය්‍දීන්ට මෙන්ම මාධ්‍ය ආයතනවලට පහරදී ගිණී තැබීම්කල කිසිදු අයෙක් මෙතෙක් නීතිය හමුවට පැමිණවීමට බලධාරීන්ට නොහැකි වී ඇත්තේ ඉහත කී කියමනේ සත්‍යතාවය නිසා දැයි සාධාරණ සැකයක් දැන් මතුවනු ඇත.[RP]

කෙසේ නමුත් ධර්මර්ත්නම් සිවරාම් නම් ප්‍රවීන දේශපාලන විචාරකයා, ජනමාධ්‍යවේදියා ඝාතනය කර වසර 10ක් නික්ම යමින් තිබේ. නමුත් මේවන විටවත් සිවරාම් ඝාතනය කළ ඝාතකයින් හරිහැටි හඳුනාගන්නට බලධාරීන්ට නොහැකි වී ඇත. මෙවන් ඝාතනයන් සිදු වී වසර ගණනාවක් ගතවූත් එයට අදාල ඝාතකයින් සොයාගැනීමට බැරි රටක කෙසේ නම් යහපාලනයක් ගොඩනගන්නට හැකි වෙයිද?

යහපාලනය තුළ…

සිවරාම් මරා දැමුණේ රාජපක්ෂලා රටකරවන කාලයේදීය. නමුත් දැන් ඇත්තේ එම පාලනය පෙරළා දමා යහපාලනයක්, නිදහසක් ගෙන එන බවට සපත කරමින් පැමිණි සිරිසේන-වික්‍රමසිංහ ආණ්ඩුවකි. පසුගිය ජනවාරි 8වෙනිදාට පෙර ලංකාව තුළ සිවරාම් වැනි ඝාතනය කළ මාධ්‍යවේදීන්ගේ, ඝාතනයන්ට වගකිවයුතු ඝාතකයින් පිළිබදව කඩිනම් පරීක්ෂණයන් පවත්වා එම ඝාතකයන් නීතිය හමුවට පමුණුවන බව වර්තමාන ජනාධිපති මෛත්‍රීපාල සිරිසේන සෑම තැනකම කියා සිටියේ ය. නමුත් දැන් දින 100ද ඉක්ම ගොසිනි. නමුත් එවැනි කිසිදු ඝාතනයකට හෝ අතුරැදන් කිරීමකට හෝ වගකිවයුතු පුද්ගලයන් නීතිය හමුවට පැමිණවීමට ගන්නා උනන්දුමය උත්සහයක් පෙනේනට නැත. අවම වශයෙන් ජනාධිපතිවරයා, අගමැතිවරයා හෝ එැවැනි කිසිවෙක් තබා දකුණේ බොහෝ මාධ්‍ය සංවිධාන ද එවන් හඩක් නගන්නේ නැති සේයකි.

නමුත් පසුගිය කාලයේ ජනමාධ්‍ය ඇමතිවරයා පවසා සිටියේ ‘සිය ජීවිතාරක්ෂාව පතා රටින් බැහැරව සිටින මාධ්‍යවේදීන්ට නැවත තම රටට පැමිණිමට ආරාධනා කරන බවයි‘ නමුත් මේ සම්බන්ධයෙන්, ජීවිතාරක්ෂාව පතා රටින් පිට පිටුවහලේ ජීවත් වන ඇතැම් මාධ්‍යෙව්දීන්, ක්‍රියාකාරීන් පවසා සිටියේ ‘ලංකාව තුළ ආරක්ෂාව පිළිබදව ක්‍රියාවෙන් තහවරු කරන තෙක් අපිට කිසිදු විශ්වාසයක් නැති බවයි.‘ සිවරාම් මරා දමා වසර 10ක් ගෙවෙන මේ මොහොතේ එය සත්‍යයක් බව තහවරු වෙමින් තිබේ. එය එසේ වන්නේ නව පාලනයේ දින 100 ද ඉක්ම ගොස් ඇති මොහොතක ඝාතනය කල, අතුරුදන්කළ හෝ පහර කෑමට ලක්වූ කිසිදු මාධ්‍යවේදියෙකුට මේ දක්වා ලංකාව තුළ යුක්තිය ඉටු කිරීමේ සේයාවක් වත් දක්නට නොමැති වීමයි.

මෙවැනි තත්ත්වයක් තුළ නව පාලනයේ ‘යහපාලනය‘ යතාර්ථයක් කර ගත හැකි වේද?

සටහන අවසන් කරන්නට ‘තරාකී‘ හෙවත් සිවරාම් වෙනුවෙන් මංජුල වෙඩිවර්ධන ලියූ කවියක් මෙසේ පළකරමු.

නින්ද නොඑනා අන්ධකාරය රළ නඟයි
අන්ධකාරය බිඳී තරුවක් නුබ නැ‍‍ඟෙයි
සිංදු කියනා මාළුවෝ නුඹෙ නම කියයි
තරාකී නුඹෙ සරාගී කටහඬ ඇසෙයි

මන්ද මාරුතයේ එතී එන රුධිරයේ
සිංදු කියනා කටහඬක මතකය තියේ
චණ්ඩ මාරුත හමා ආ රුදු රාත‍්‍රියේ
මන්ද සකි සඳ නින්ද පතුළට ඔබ ගියේ

කිඹුල්වත් නගරයේ නිරුවත පෙනුනා
කිඹුල් ඇළ ඉවුරේ කිඹුල් දත් දිළුණා
තැවුල් හදවත් දොර පියන්පත් ඇරුණා
ඔබේ කටහඬ ඒ හදින් හද පිරුණා
vikalpa
[Pic by JDS]